Azərbaycan və Peru xarici işlər nazirləri görüşüblər

Azərbaycanın xarici işlər naziri Elmar Məmmədyarov Peruya rəsmi səfəri çərçivəsində bu ölkənin xarici işlər naziri Rafael Roncagliolo ilə görüş keçirib.

XİN-in mətbuat xidmətindən "Vətəninfo.az"a verilən məlumata görə, R. Roncagliolo E. Məmmədyarovun səfərindən məmnun olduğunu deyərək Qafqaz regionunun dinamik inkişaf edən ölkəsi Azərbaycanla əməkdaşlıqda maraqlı olduqlarını bildirib. Azərbaycanı Qafqaz regionunun qapısı adlandıran perulu nazir ikitərəfli münasibətlərin genişləndirilməsi üçün müqavilə-hüquq bazasının yaradılmasının vacibliyini vurğulayıb.

E. Məmmədyarov Latın Amerikası ölkələrinə səfəri çərçivəsində keçirdiyi görüşlər barədə qısa məlumat verərək Azərbaycanın digər qitə ölkələri kimi Peru ilə də əməkdaşlığın genişləndirilməsində maraqlı olduğunu söyləyib. Azərbaycan prezidenti İlham Əliyevin Peru prezidentinə ünvanladığı məktubu həmkarına təqdim edən nazir, məktubun dövlət başçısına çatdırılmasını xahiş edib. İki ölkə arasında siyasi səviyyədə əlaqələrin inkişaf etdirilməsinin iqtisadi sahədə əməkdaşlıq üçün möhkəm zəmin yaradacağını qeyd edən E. Məmmədyarov bunun üçün qarşılıqlı rəsmi səfərlərin davamının, biznes forumların təşkilinin və mədəniyyət tədbirlərinin keçirilməsinin vacibliyini vurğulayıb.

E. Məmmədyarov həmkarına Ermənistan-Azərbaycan münaqişəsi və onun həlli istiqamətində aparılan danışıqlar barədə də ətraflı məlumat verib. Sonda o, R. Roncagliolonu Azərbaycana səfərə dəvət edib. Perulu nazir dəvəti məmnuniyyətlə qəbul etdiyini deyib.