“Azərbaycanlıların soyqırımı: Tarixin qanlı salnaməsi” ikicildliyinin təqdimatı keçirildi

Bu gün “Azərbaycanlıların soyqırımı: Tarixin qanlı salnaməsi” adlı ikicildlik kitabın təqdimat mərasimi keçirilib.”Vətəninfo.az”ın məlumatına görə, “Azərbaycan” qəzetinin redaksiyası tərəfindən hazırlanan  kitab müasir müstəqil Azərbaycan dövlətinin banisi, ulu öndər Heydər Əliyevin əbədiyaşar xatirəsinə ithaf edilib.  Fundamental ikicildliyin təqdimat mərasiminə həsr olunan  tədbiri giriş sözü ilə Azərbaycan Dövlət Teleqraf Agentliyinin (AzərTAc) baş direktoru Aslan Aslanov açıb və bildirib ki, tariximizin acı səhifələrindən biri olan 31 mart - Azərbaycanlıların Soyqırımı Günü ərəfəsində toplaşıblar və hazırlanan  kitabın təqdimatının məhz bu gün keçirilməsinin mühüm rəmzi mənası vardır. A.Aslanov vurğulayıb ki, bu dəyərli kitabı vərəqləyən hər kəs mənfur qonşularımızın zaman-zaman xalqımızın başına gətirdikləri faciələrin tarixi köklərinə bir daha nəzər salacaq, erməni faşizminin xislətini və erməniliyin mahiyyətini dərindən dərk edəcəkdir. Tədbirdə tanınmış ictimai-siyasi xadimlər və nüfuzlu alimlərin kitabla bağlı fikirləri də dinlənilib.