Bakıda kütləvi aksiya - Polislə toqquşmalar var - YENİLƏNİB

İctimai Palatanın bu günə planlaşdırdığı etiraz aksiyası bu gün saat 13-də Fəvvarələr meydanında başlayıb. 50-yə yaxın İctimai Palata fəalları Fəvvarələrlə meydanına daxil olaraq "İstefa", "Azadlıq" şüarları səsləndiriblər.

Qeyd edək ki, etiraz aksiyasının məqsədi Bakı Şəhər İcra Hakimiyyətinin İctimai Palataya əlverişli mitinq meydanı ayırmasından imtinadır.
"Yeni Müsavat"ın əməkdaşı Röya Rəfiyevanın verdiyi məlumata görə, İP fəallarının daha bir qrupu Bakı Şəhər İcra Hakimiyyətinin qarşısında toplaşaraq şüar səsləndiriblər. Polislər və mülki geyimli cəza dəstələri fəallar qarşı aqressivlik nümayiş etdirib, onları döyüblər. 20-dən artıq İP fəalı saxlanılaraq üzərinə "Eurovision" yazılmış avtovuslara doldurulublar.

Bənzər aksiya Sabir bağında da olub. Burada da fəalların aksiyası zorakılıqla dağıdılıb.

Əməkdaşımız Emil Salamoğlunun verdiyi xəbərə görə, Qoşa Qala qapısının önündə etiraz aksiyasının qarşısını alan və fəalları döyüb-tutan polis qüvvələri aksiyanın başa çatdığını güman edib dağılışsalar da, gözlənilmədən fəalların daha bir dalğası Natəvanın heykəlinin həndəvərində toplaşaraq yenidən şüarlar səsləndirə-səsləndirə irəliləyiblər. Bir qədərdən sonra polis qüvvələri onların qarşısını alıblar, toqquşma yaranıb. Bir qadının ürəyi gedib, onu özünə gətirmək üçün təcili tibbi yardım briqadası çağırılıb.

Aksiya barədə təfərrüatlı  Bir bilgilər, eləcə də foto və videoçəkilişlər gün ərzində sayta əlavə ediləcək.

Musavat.com