Bəxtiyar Vahabzadənin Əkrəm Əylisliyə cavabı

"İNDİ DƏ DAŞNAKA YOL AXTARIRSAN"

Bu şeiri Azərbaycanın xalq şairi Bəxtiyar Vahabzadə 1998-ci ildə Əkrəm Əylisliyə həsr edib. Şeir ilk dəfə 1998-ci ildə “Bozqurd” qəzetində dərc olunub, son günlər isə bir sıra saytlarda və sosial şəbəkələrdə yer almaqdadır.

Özlüyündə bu, poeziya janrlarından ən mübahisəlisi olan həcv janrında yazılıb. Həm də hələ tam dəqiq deyil ki, bu sərt ifadələrlə dolu bu həcvin müəllifi doğrudanmı Bəxtiyar Vahabzadədir. Bilinən odur ki, həcvi xüsusi istedadı olan və qoşma janrının incəliklərini bilən bir adam qələmə alıb.

AXTARIRSAN

Öz gözündə tiri görməyən gəda,

Özgənin gözündə qıl axtarırsan.

Köhnə şakərindir, bulandırmağa,

Hər gün, hər ay göl axtarırsan.

Qələmin korlaşıb düşmüsən dərdə,

Hörmətin qalmayıb sənin heç yerdə.

Dölsüz olduğunu bildin nəsrdə,

İndi də “şeirdə” döl axtarırsan?

Bir zaman vətəni Aşota satdın,

Ürək bulandırdın, könül qanatdın.

Palıda, çinara sən çirkab atdın,

İndi gizlənməyə kol axtarırsan!

Qəlbin daş, ağlın da bir ovuc peyin

Döş-döşə gəlməyə qalmayıb heyin

Baxıb ayağına ölmüş eşşəyin,

Kürdənə vurmağa nal axtarırsan.

İçində zülmətdir, səhər bilirsən,

Qatırsan, özünü kəhər birlirsən,

Köhnə palanını yəhər bilirsən,

Belinə salmağa çul axtarırsan.

Özgənin uğuru səni yandırır,

Həsədin kinini qıcıqlandırır.

Özünün yalını bal adlandırır,

Özgənin balında yal axtarırsan.

Biz üzü gəlinsən, bir üzü arvad,

Kommunist, AXC, sonra Musavat.

Ordan da çıxmısan, ay evi bərbad,

İndi də Daşnaka yol axtarırsan.