Bir yarpaq ağacda etdi intihar - Şeir

Xanım İsmayılqızı.

Bir yarpaq ağacda etdi intihar,

Nə budaq danışdı, nə yarpaq dindi.

Göydən qəm yerinə yağdı bəyaz qar,

Bir ömür qırıldı kökündən indi.

Bu yarpaq ilk bahar ömrü yaşadı,

Naz etdi ağacın yarpaqlarına.

Yamyaşıl rəngiylə gözü oxşadı,

Pıçıltılar qondu dodaqlarına.

Üzünə bir payız həsrəti güldü,

Yağışdan yağmura düşdü elə bil.

Sözünü demədən diriykən öldü,

Budaqdan torpağa köçdü elə bil.

Ağacsa qürurla dayanıb yenə,

Yarpağın ömrünə gəldi son bahar.

Əlvida deyərək sevdiklərinə,

Bir yarpaq ağacda etdi intihar.

Qəlbimə sığınan olmasa bir an,

Ömürdən son damla içmək istərəm.

Ruhumun gözünü bağlasa duman,

Mən də yarpaq kimi köçmək istərəm.

Axı bu yarpağın nə günahı var,

Bir budaq üstünə ömrü dar gəlib.

Bir yarpaq ağacda etdi intihar,

Köməyinə yalnız intihar gəlib.