Cəbhədəki vəziyyətlə bağlı təcili görüş olacaq

Azərbaycan və Ermənistanın xarici işlər nazirləri iyunun 18-də Parisdə görüşəcəklər.

Trend-in məlumatına görə, bu barədə jurnalistlərə xarici işlər naziri Elmar Məmmədyarov məlumat verib. Nazirin sözlərinə görə, cəbhə xəttində insanların ölməsi Dağlıq Qarabağ münaqişəsi üzrə danışıqlar prosesinə mənfi təsir edir:

"Münaqişə həll edilməyənədək belə insidentlər, təəssüf ki, davam edəcək, buna görə də biz Ermənistanı böyük sülh sazişi üzərində işləməyə başlamağa çağırırıq", - Məmmədyarov qeyd edib.
Onun sözlərinə görə, Parisdə görüşdə Azərbaycan Ermənistan tərəfinə başa salmağa çalışacaq ki, bundan sonra da status-kvonun saxlanması qəbuledilməzdir.
Məmmədyarov bildirib ki, Dağlıq Qarabağ münaqişəsi ABŞ dövlət katibi Hillari Klintonla danışıqların da əsas mövzusu olacaq:

"Biz həmişə başa düşmüşük ki, bu mövzu olduqca həssasdır və həm beynəlxalq vasitəçilər, həm də münaqişə tərəfləri uzanan münaqişədən çıxış yolu tapmalıdır", - nazir vurğulayıb.

Məmmədyarovun sözlərinə görə, Azərbaycan Ukraynanın gələcəkdə ATƏT-ə həmsədrliyinə böyük ümidlər bəsləyir.