Dünən ovda idim, nə əməliyyat?

"Haqqımda bu cür məlumatların yayılması məqsədlidir"

Ötən gün mətbuatda Daşkəsən rayon İcra Hakimiyyətinin başçısı, sabiq millət vəkili Əhəd Abıyevin xarici ölkələrdən birində gözündən əməliyyat olunduğu haqda məlumat yayılmışdı. Sonradan Ə.Abıyevin əməliyyat keçirməsi musavat.com saytında təkzib olundu.

Vətəninfo.az-a açıqlamasında isə Ə.Abıyev bildirib ki, o, bazar günü xəstəxanada deyil, ovda olub: "Nə əməliyyat? Nə xəstəlik? Maşallah, özümü əla hiss edirəm. Səhərdən axşamadək ovda olmuşam. Daşkəsənin təmiz havasından udub daşkəsənlilərlə birlikdə rayonun inkişafına çalışıram. Haqqımda bu cür məlumatların yayılması məqsədlidir".

Sonda yeni Daşkəsən layihəsi çərçivəsində bir sıra işlərin görüldüyünü qeyd edən icra başçısı bu işlərlə yaxından tanışlıq məqsədilə mətbuat işçilərini yaxın vaxtlarda rayona dəvət edəcəyini də bildirdi.

Vətəninfo.az