Əli Kərimlinin xanımı da Elçibəyi zəhərləməkdə ittiham olundu

Əli Kərimov İranın fətvası ilə Əbülfəz Elçibəyi zəhərləyib. Elçibəyi 1998-ci ildə, Əli Kərimovun ad günündə zəhərlədilər”.

Bu sözləri Publika.Az-a açıqlamasında Elman Türkoğlu deyib.

Elman Türkoğlu mərhum prezident Əbülfəz Elçibəyin zəhərləyən qadınlar arasında Əli Kərimlinin həyat yoldaşının da olduğunu iddia edib:

“Onu Əli Kərimovun arvadı Samara Seyidova, Gözəl Bayramova, Rövşanə Əliyeva və AXCP-nin üzvü olan Səmayə adlı qadın zəhərləyib. Elçibəyi zəhərləmək üçün İrandan dərmanı Qənimət Zahid gətirib. 26 milyon dollar müqabilində dərmanı əldə edib. Bu elə dərman idi ki, 1 ilə Elçibəyin daxili orqanları məhv etdi. Sonda da dedilər ki, Əbülfəz xərçəngdən öldü. Əli Kərimov, Qənimət Zahid, Fuad Mustafayev, Əliməmməd Nuriyev bu dörd nəfər bütün oyunu qurdular. Qənimət Zahid İrana getməmişdən öncə bu dörd nəfərlə görüşüb-danışıb. Onlar Elçibəyi zəhərlədilər ki, AXCP-nin sədri Əli Kərimov olsun. Daha sonra da prezident olmağını istəyirdilər. Bu məlumatların kim tərəfindən mənə deyildiyini prokurorluqda ifadəmdə bildirmişəm. İndi adını açıqlamaq hüququm yoxdur”.

E.Türkoğlu bildirib ki, AXCP-də hər kəs Əbülfəz Elçibəyin kim tərəfindən zəhərləndiyini bilir:

“Elə o zaman məlumat verdim ki, Elçibəyi zəhərləyiblər. Kim tərəfindən zəhərələndiyini isə deməmişdim. Mənim dediklərim “Yeni Müsavat” qəzetində də çıxıb, hətta Aqil Abbasa da müsahibə vermişdim. Elçibəyin zəhərlənməsi ilə bağlı fikirlər AXCP-nin daxilində də var idi. Bunu hər kəs bilirdi. Amma indi susurlar. Mən isə susmayacam”.