Ermənilər Xocalı soyqırımına görə azərbaycanlılara başsağlığı veriblər. İstiPress-in məlumatına görə, bu barədə müraciəti erməni publisist, yazıçı və ictimai xadim Vahe Avetyan öz "Facebook" səhifəsində yerləşdirib.

İsveçdə yaşayan erməni bununla bağlı videomüraciət yayıb. O, müraciətində deyib ki, Ermənistandan qaçan bir qrup ziyalı tərəfindən xüsusi bəyanat hazırlanıb. Burada iki xalqın birlikdə yaşamı, tarixi və faciələrə toxunulub.

Ən çox diqqət çəkən məqam isə Xocalı faciəsi ilə bağlıdır. Erməni publisist deyib ki, müraciət müəllifləri ticari sövdələşmə mövzusu etmək istəmirlər. "ABŞ, Kanada, İsveç və dünyanın digər yerlərində yaşayan ermənilər bildirirlər ki, 1992-ci ildə Xocalıda baş verənlər soyqırım anlayışı ilə üst-üstə düşür. Ermənilər faciə qurbanlarının ailələrinə və Azərbaycan xalqına başsağlığı verir".

Qeyd edək ki, adıçəkilən şəxs ötən ilin noyabr ayında Azərbaycana səfər edib. O, Xocalı soyqırımı qurbanlarının xatirəsinə ucaldılan abidə önündə baş əyib, Bakıda "Ermənistan, Azərbaycan, Dağlıq Qarabağ münaqişəsi: əsas maneələr və nizamlanma perspektivləri: Ermənistan və Azərbaycandan baxış” mövzusunda təşkil olunmuş beynəlxalq konfransda iştirak edib.