Gənc Ailələrə Sosial və Psixoloji Dəstək İctimai Birliyi təsis edildi

İradə Cəlilova: “Gənc ailələrin sosial problemləri ilə bağlı araşdırmalar aparılacaq”

Bir qrup ictimai fəal şəxslər Gənc Ailələrə Sosial və Psixoloji Dəstək İctimai Birliyi təsis edib. İB-in sədri İradə Cəlilova təşkilatın məqsəd və vəzifələri barəsində məlumat verərkən qeyd edib ki, birliyin əsas məqsədi gənc ailələrə psixoloji, hüquqi, tibbi və sosial dəstək göstərmək və onların maarifləndirilməsindən ibarətdir. Eyni zamanda təşkilat gənc ailələrin sosial problemləri ilə bağlı araşdırmalar aparacaq, ailə quran gənclərin psixoloji xidmətlərə çıxışını təmin edəcək, gənc qadınların ailədaxili zorakılıqdan qorunmasına yardım göstərəcək, məişət zorakılığının qurbanı olan gənc qadınlara xidmətlər göstəriləcək. Bununla yanaşı gənc ailələrin məşğulluq problemlərinin həllinə dəstək göstəriləcək, gənc ailələrin övladlarının maarifləndirilməsinə dəstək veriləcək.
İ.Cəlilova onu da bildirib ki, birliyin geniş əməkdaşlıq proqramı işlənib hazırlanıb. Bura yerli təşkilatlarla yanaşı beynəlxalq təşkilatlarla əməkdaşlıq da daxildir. Bununla yanaşı Ailə, Qadın və Uşaq Problemləri üzrə Dövlət Komitəsi və Gənclər və İdman Nazirliyi ilə qarşılıqlı fəaliyyət göstəriləcək.
Qeyd edək ki, birliyin Facebookda öz səhifəsi yaradılıb və fəaliyyəti ilə bağlı mütamadi olaraq səhifədə məlumatlar yerləşdiriləcək.