İmişli rayonunda Polis günü qeyd olunub

Polisləri peşə bayramları münasibətilə təbrik edən İmişli rayon icra hakimiyyətinin başçısı Vilyam Hacıyev dövlət başçısının hüquq mühafizə orqanlarının formalaşmasına, onların maddi texniki bazasının inkişafına göstərdiyi qayğıdan danışıb. Bildirib ki, Azərbaycan polisi yarandığı gündən xalqın və dövlətin mənafeyinə ləyaqətlə xidmət edib, asayişin və təhlükəsizliyin mühafizəsi, sabitliyin  əmin-amanlığın qorunması, cinayətkarlığa qarşı mübarizə kimi məsuliyyətli vəzifələrin öhdəsindən vicdanla gəlib. Çıxış edən İmişli rayon polis şöbəsinin rəisi Vaqif Müslümov polis əməkdaşlarının ictimai asayişin qorunması sahəsindəki xidmətləri ilə yanaşı, Qarabağ müharibəsi zamanı ölkəmizin ərazi bütövlüyü uğrunda gedən döyüşlərdə fəal iştirak etdiyini söyləyib.

Digər çıxış edənlər də bildirib ki, Azərbaycan polisi öz peşəkarlığını artırmaqla yanaşı, eyni zamanda beynəlxalq standartlara cavab verən lazımi texnika və avadanlıqlarla təmin edilib. Sonda bir qrup polis əməkdaşına hədiyyə və fəxri fərman verilib.