İRAQDAKI MÜXALİF MÜCAHİDLƏR 5 ÖLKƏYƏ, O CÜMLƏDƏN AZƏRBAYCANA KÖÇÜRÜLƏCƏK

İRAN SAYTI: İRAQDAKI MÜXALİF MÜCAHİDLƏR 5 ÖLKƏYƏ, O CÜMLƏDƏN AZƏRBAYCANA KÖÇÜRÜLƏCƏK

"Veteninfo.az" mediaforum saytına istinadən bu xəbəri verir

ABŞ İran İslam Respublikasının əsas müxalif qüvvələrindən sayılan İran Xalq Mücahidləri Təşkilatı üzvlərinin İraqdan köçürülməsi üçün 5 qonşu ölkə ilə razılığa gəlib. Məlumatı İranın hökumət saytlarından olan “İsna.ir” saytı aprelin 12-də yayıb.

Saytın məlumatına görə, iranlı müxaliflərin köçürüləcək ölkələrdən birinin də Azərbaycan Respublikası olduğu bildirilir: “Bu terrorçu qruplaşma üzvlərinin İraqdan çıxarılması qəti olduqdan sonra ABŞ 5 ölkə ilə danışıqlar aparıb. Əldə olunmuş razılaşmaya əsasən, terrorçu qruplaşma üzvləri ABŞ-ın Orta Şərqdəki müttəfiq və dostları sayılan Səudiyyə Ərəbistanı, İordaniya, Azərbaycan Respublikası, Qətər və Pakistan arasında paylanacaq”.

Xalq Mücahidlər Təşkilatı İranda şahlıq dövründə yaradılıb. Təşkilat 1980-ci illərdə İran İslam Respublikasına qarşı silahlı mübarizə aparmağa başlayıb. Silahlı müqavimət məğlubiyyətə uğrayandan sonra Xalq Mücahidlər Təşkilatının minlərlə üzvü edam edilib, on minlərlə üzvü isə xarici ölkələrə mühacirət edib. Təşkilatın silahlı qanadı əsasən İraqdakı “Əşrəf” hərbi qərargahında məskunlaşıb. ABŞ-ın 2003-cü ildə İraqa hərbi hücumundan sonra bu ölkədəki mücahidlər tamamilə tərksilah edilərək “Əşrəf” qərargahında nəzarət altında saxlanılıb.