Kitab karvanı indi də Qaradağa gedir

“Səyyar kitab” sərgi-yarmarkasında kitab hədiyyələri də gözlənilir

Bakı Şəhər Mədəniyyət və Turizm İdarəsi və Hədəf Nəşrlərinin paytaxt qəsəbələrində birgə təşkil etdiyi “Səyyar kitab” sərgi-yarmarkasının növbəti - üçüncü dayanacağı Qaradağ rayonu olacaq.

Hədəf Nəşrlərinin mətbuat xidmətindən verilıən əlumata görə, tədbir aprelin 12-də Lökbatan qəsəbəsində, Qaradağ rayonu Ə.Əmirov adına Mədəniyyət Sarayının qarşısında baş tutacaq.

Sərgi gün ərzində saat 11.00-dan 18.00-a qədər davam edəcək. Mindən çox adda, Azərbaycan, ingilis, türk və rus dillərində kitabların təqdim olunduğu sərgi-yarmarkada kitabların güzəştli qiymətlərlə satışı ilə yanaşı, “bir kitab alana bir kitab hədiyyə” kampaniyası da həyata keçiriləcək və kitablar hədiyyə olunacaq.

Kitab sərgisinin məqsədi sakinlərin kitabçılıq sahəsində olan yeniliklərdən xəbərdar etmək və onlara lazım olan müxtəlif kitab və dərs vəsaitlərinin güzəştli qiymətlərlə satışını gerçəkləşdirməkdir.

Sərgilərdə Bakı sakinləri həm Hədəf Nəşrlərinin, həm də müxtəlif yerli və xarici nəşriyyatların kitab məhsulları ilə tanış olmaq, ucuz qiymətə əldə etmək imkanı qazanacaq. Sərgi-yarmarka çərçivəsində abituriyentlər və magistratura imtahanlarına hazırlaşan bakalavrlar da özlərinə faydalı olan test bankları və dərs vəsaitlərini ala biləcəklər.

“Səyyar kitab” sərgi-yarmarkasına hamı dəvətlidir. Sərgi-yarmarkası zamanı yazarlarla görüş gözlənilir.