McDonald's korporasiyasının rəhbəri dəyişir

Dünyanın ən iri fast food restoranlar şəbəkələrindən birinin sahibi Amerikanın McDonald's korporasiyasına bu ilin mart ayından etibarən Stiven İsterbruk rəhbərlik edəcək.

Hazırda Stiven İsterbruk korporasiyanın baş icraçı vitse-prezidenti və reklam şöbəsinin rəhbəridir. McDonald's korporasiyasına təxminən 2,5 il rəhbərlik edən hazırkı prezident Don Tompsonun bu il martın 1-dən etibarən istefa verəcəyi bildirilir.

Kompaniyanın son ildə 2,25 faiz ucuzlaşan aksiyaları bu xəbərdən sonra bahalaşmağa başlayıb. Onların qiyməti elektron hərracda təxminən 3 faiz artaraq 91,50 dollara çatıb.

Qeyd edək ki, McDonald's korporasiyasının ABŞ-da 14 minə qədər restoranı fəaliyyət göstərir. Ümumilikdə isə dünyanın 100 ölkəsində kompaniyanın brendi altında gün ərzində təxminən 70 milyon insana xidmət göstərən 36 mindən artıq restoran işləyir.