Publika.az xəbər verir ki, iclasda Əmək və sosial siyasət komitəsinin sədri Hadı Rəcəbli çıxış edərək, Azərbaycanda ictimai yerlərdə tütün məmulatlarından istifadənin məhdudlaşdırılmasını nəzərdə tutan qanun layihəsinin əhəmiyyətindən danışıb.

Komitə sədri deyib ki, sözügedən qanun layihəsi Milli Məclisin Əmək və sosial siyasət komitəsinin yaz sessiyasının qanunvericilik planına daxil edilib.

"Bu layihə Azərbaycanda tütünçülüyün inkişafına qarşı deyil. Burada həm istehlakçıların, həm istehsalçıların balanslaşdırılmış marağı nəzərə alınır. Bir sözlə, millətin marağı əsas götürülməlidir. Milli Məclisin fəaliyyətinin əsas məqsədi də budur. Həmin dinləmələrə tütün istehsal edən, o cümlədən idxalçı şirkətlərin nümayəndələrini də dəvət etmək yaxşı olardı. Arzu edirəm ki, qanun layihəsi parlamentin yaz sessiyasında qəbul edilsin”.

Komitə sədri Hadı Rəcəbli ictimai dinləmələrin keçirilməsi təklifini dəstəkləyib.

"Məktəblərin yaxınlığında yerləşən köşklərdə ədədlə siqaret satışının qarşısını almaq da yaxşı olar. Çünki siqareti ədədlə adətən yeniyetmələr və gənclər alırlar”.

H.Rəcəbli komitənin ümumi işini də yüksək qiymətləndirdiyini söyləyib.