Metyu Brayza rus-erməni sazişindən danışdı

Xocalı aeroportunun istismarının qarşısını almaq üçün leqal metodlar mövcuddur.

Trend-in məlumatına görə, bu barədə ABŞ-ın Azərbaycandakı keçmiş səfiri, ATƏT-in Minsk qrupunun keçmiş həmsədri Metyu Brayza bildirib.

Brayza Ermənistanın Azərbaycanın işğal edilmiş ərazisində aeroport açmaq planını şərh edərkən deyib ki , Azərbaycan beynəlxalq hüquq çərçivəsində öz ərazi bütövlüyünü müdafiə etmək hüququna malikdir: "Şübhəsiz ki, işğal altında olan ərazilərdə aeroport açılması məsələsi Dağlıq Qarabağ münaqişəsi ətrafında gərginliyi artıra bilər. Lakin bu məsələni, Dağlıq Qarabağ münaqişəsi ilə bağlı digər problemlər kimi, ATƏT-in Minsk qrupu çərçivəsində həll etmək mümkündür. Mən bu barədə ABŞ-ın Azərbaycandakı səfiri və Minsk qrupunun həmsədri olarkən danışmışam".

Rusiya ilə Ermənistan arasında hərbi-texniki əməkdaşlıq haqqında sazişin hazırlanması məsələsinə toxunan Brayza bildirib ki, bu, məntiqi addımdır, çünki Rusiyanın Ermənistanda hərbi bazası mövcuddur:"Lakin digər tərəfdən sual yaranır ki, bu qərar ATƏT-in Minsk qrupunun həmsədri kimi Rusiyanın imicinə necə təsir edəcək".

Onun sözlərinə görə, ən əsası, hər şey şəffaf olmalıdır və həmsədr ölkələrin hamısı Rusiya ilə Ermənistan arasında nə baş verməsindən xəbərdar olmalıdır.

Veteninfo.az