Misir Mərdanovun həbs olunacağı deyilir

Təhsil naziri Misir Mərdanovun vəzifəsindən uzaqlaşdırılacağı və ya həbs olunacağı ilə bağlı informasiyalar yeni olmasa da, aldığımız son xəbər artıq nazirin həbsinə yüksək səviyyədə razılıq alındığından xəbər verir.

“Qafqazinfo”nun məlumatına görə, ali təhsil ocaqlarına Misir Mərdanovun imzası ilə aparılan “köçürmə” əməliyyatlarının siyahısını hazırlamaq və bu köçürmələrdəki qanunsuzluqları üzə çıxarmaqla bağlı tapşırıq verilib. Artıq bir çox ali məktəb rəhbərləri öz kollektivləri ilə qapalı toplantı keçiriblər və M.Mərdanovun sərəncamı ilə aparılan köçürmələrin konkret siyahısı da tərtib edilib. Həmin qapalı toplantıda iştirak edən şəxslərdən aldığımız məlumata görə, hətta Misir Mərdanovun əleyhinə ifadə verəcək şəxslər də müəyyənləşib.

Bununla bağlı “Vətəninfo.az”a daxil olan məlumata əsasən, Misir Mərdanovun vəzifədən uzaqlaşdırılması 1 neçə ay bundan əvvəl Elmar Qasımovun prezidentin sərəncamı ilə vəzifədən uzaqlaşdırıldığı vaxtdan planlaşdırılıb. E.Qasımov onun yerinə təyin olunacağını düşünərək dostlarına qonaqlıq verib. Bu qonaqlıq isə ona baha-başa gəlib və vəzifəsindən uzaqlaşdırılıb. Dostları və Rövnəq Abdullayevin dəstəyi ilə yenidən vəzifəyə gətirilib.

Könül İbrahim