Mollalar Təbrizdəki konsulluğumuza hücum edə bilərlər

İran İnqilab Keşikçiləri Korpusunun (“Sepah”) keçmiş komandanı, Sistemin Məsləhətini Müəyyənləşdirən Qurumun üzvü Möhsün Rzayiyə məxsus “Tabnak” saytı Bakıda keçiriləcək “Eurovision 2012” mahnı müsabiqəsi haqda yazı dərc edib.

“Vətəninfo.az” Media forum saytına istinadən xəbər verir ki, mayın 21-də dərc olunan yazıda İrandakı “Hizbullah Ənsarı” təşkilatının Təbriz qanadının “Eurovision 2012” mahnı yarışması ilə bağlı bəyanat yaydığı bildirilir.
Yazıda deyilir: “Eşitdiyimizə görə, “Hizbullah Ənsarı” təşkilatının Təbriz qanadı Azərbaycan hökumətinin bu ölkədə “Eurovision” mahnı müsabiqəsi ilə bərabər homoseksualların paradını keçirməsi haqda bəyanat yayıb. Bəyanatda vurğulanır ki, azərbaycanlı dindarların səbir kasası artıq daşıb və biz Təbrizin qeyrətli dindar qüvvələri olaraq qeyrətli Azərbaycan vətəndaşları ilə birlikdə homoseksualların paradı və “Eurovision” biabırçılıq ləkəsini silmək üçün İlham Əliyev hökumətinin Təbrizdəki fəsad yuvasını ələ keçirərək onu Azərbaycanın sürgündəki hökumətinə tapşıracağıq”.