Qalib Şəfahət -Sən bizə qonaq gəlibsən.

Yuxudan ayılıb gördüm,

Sən bizə qonaq gəlibsən.

Üzün-gözün tər içində

Elə bil uzaq gəlibsən.

Heç baxmadım üzünə də

Elə bil yad adam gəlib.

Yatanda qapı bağlıydı

Bəs bu adam

Hardan gəlib?

Bu qışın qarlı günündə

Pəncərələr bağlı olur.

Gözlərində qış yuxusu,

Canında bir ağrı olur.

Bəs bu adam hardan girib

Evə hardan yol tapıb o

Bəlkə qapını çöldə yox

Içəridən açıbdı o

Şübhələr didir içimi...

Bir də gördüm ağlayır o

Tərə qarışıb..

Göz yaşı

Silməyə də yaylığı yox.

əlimi çəkdim alnına,

alnı qar tək soyuq idi.

Gözüm dikildi üzünə

Heç onun gözü yox idi.

Dindirdim danışmadı o

Bəlkə ağzı,dili yoxdu.

əl uzatdım əllərinə

gördüm nə də əli yoxdu.

Çox görmüşdü ölü adam

Hələ belə ölü yoxdu.

Göz yaşını hardan alır?

Göz yerində gözü yoxdu.

Necə girib bu evə o,

Axı onun üzü yoxdu.

Nə ağzı var,nə də dili

Nə də onun sözü yoxdu.

Bu gəliş bir söz olacaq

Söhbət,söz olmayan yerdə.

Bağrım yanıb köz olacaq

Ocaq,köz olmayan yerdə.

Bir mən,bir də köhnə şəkil...

Sükut çökür aramıza

Xatirələr,nə də şəkil

Məlhəm olmur yaramıza.