Qarsda təhlükəsizlik tədbirləri gücləndirilib

Son günlər Türkiyənin cənub-qərb və qərb regionlarda PKK terror qruplaşmanın fəallaşması ilə əlaqədar Qars şəhərində təhlükəsizlik tədbirləri gücləndirilib.

Vətəninfo.az xəbər verir ki, bu barədə "Report"a Azərbaycanın Qarsdakı baş konsulluğundan məlumat verilib.

Məlumata əsasən, ölkədə vəziyyətin gərginləşməsinə baxmayaraq, Azərbaycanın diplomatik korpusunun fəaliyyətində heç bir dəyişiklik yoxdur, iş əvvəlki qaydada davam edir: "Lakin baş konsulluğun binası vəziyyətin gərginləşdiyi ərazilərə yaxın olduğundan, binanın ətrafında təhlükəsizlik tədbirləri gücləndirilib. Bu ərazidə həmçinin Qars valiliyinin binası və digər qurumların inzibati binaları da yerləşir".

Qeyd edək ki, son günlər PKK terror təşkilatı Türkiyənin cənub-qərb və qərb rayonlarda bir sıra terror aktları törədib. Ötən həftənin şənbə günü isə Türkiyədən Naxçıvana hərəkət edən və içərisində bir neçə Azərbaycan vətəndaşının olduğu avtobus isə hücuma məruz qalıb.