Qarşılayın Novruzu

ŞƏFƏQ AZƏR (Almaniya)

Dörd ünsürü Allah bizə veribdir,

Bayram edib, qarşilayın Novruzu.

Bu nəsihəti Dədəm Qorgud veribdir,

Xoş sözlərlə qarşılayın Novruzu!

Insan oğlu sussuz, odsuz yaşamaz,

Havasız,bir torpaqsız dağ aşamaz.

Nə duasız nə inamsız yaşamaz,

Şükür deyib qarşılayın Novruzu!

Şükür deyib min kərə bayram etmək,

Türk oğlunun adətidir əzəldən.

Yaradanın qarşısında baş əymək,

Borcumuzdur, qarşılayın Novruzu!

Yaşıllıqdır, bərəkətdir, Səməni,

Nəlbəkiyə birər-birər düz dəni.

Cərəz ilə, ləbləbi dər al, məni,

Bolluq edib, qarşılayın Novruzu!

Xonçalarla bəzəyərək süfrəyi,

Yeddi deyil, yetmiş yeddi yeməyi.

Sadalayıb, birər-birər, bəhrəyi,

Alqış deyib, qarşılayın Novruzu!

Tonqalları quraşdırın baş-başa

Hoppanaraq, bəd qüvvəni, at oda!

Kosa-keçəl, edirlər, min Tamaşa

Baxın, gülün, qarşılayın Novruzu!

Umu-küsü götürülsün aradan,

Ağır yükdür, Kin-küdrət, at başından!

Yaxşılığı Görsün, Ulu Yaradan,

Alxış edib, qarşılayın Novruzu!

Şəfəqəm mən, hər kəsi salamlaram.

Dost, tanışı, qohumları anaram,

Bayramları Müqəddəslik sayaram.

Mübarəkdir, qarşılayın Novruzu!