Rusiya İraqla danışıqlar aparır

Küvetdə çıxan “əs-Siyasə” qəzeti iki Qərb kəşfiyyatçısının hesabatlarını əldə etdiyini iddia edib.

Vətəninfo.az saytı XeberLent.az-a istinadən xəbər verir ki, qəzetdə dərc olunan məqalədə iddia edilir ki, həmin sənədlərdə Əsəd hökumətinin bioloji və kimyəvi silahları Livanın Hizbullah hərəkatının ixtiyarına verdiyi bildirilir.

Qəzet yazır ki, Almaniya və İspaniya kəşfiyyatına məxsus sözügedən hesabatlarda silahların Hizbullaha ötürüldüyü marşrut, eləcədə yerləşdirildiyi məkanlar da qeyd olunub.

Suriyanın Hizbullaha verdiyi kimyəvi və bioloji silahların Livan ərazisində, o cümlədən Livanın cənub bölgəsində yerləşdirildiyi iddia olunur.

Bu arada NBC telekanalı ABŞ-ın Suriyaya məxsus kimyəvi və bioloji silahların təhlükəsizliyi məsələsinə dair Rusiya və İraqla danışıqlar apardığı haqda məlumat yayıb. Məlumatda bildirilir ki, ABŞ danışıqlarda həmin silahların Suriyadan çıxarılaraq Rusiya və İraq ərazisinə daşınması təşəbbüsü ilə çıxış edib.