Rusiyanın Çuvaşıstan Respublikasında yaşayan və  Rusiya vətəndaşı olan bir xanım heç vaxt üzünü görmədiyi doğma müsəlman atasını axtarır. 

Moderator.az Rusiya mediasına istinadla xəbər verir ki, 31 yaşlı qadın bəlkə də doğma atasının onun varlığından xəbərsiz olduğunu düşünür. 15 il öncə -16 yaşında İslamı qəbul edərək müsəlman olmuş bu xanım adını da dəyişərək Məryəm qoyub. Yalnız 4 il sonra - 20 yaşında o, təsadüfən anasından öyrənib ki, onun əsl, bioloji atası azərbaycanlı Vüqar Əsgərovdur. 

Məlum olub ki, 1986-ci ilin payızında Məryəmin anası  kartof yığımı mövsümündə Çuvaşıstana göndərilmiş  azərbaycanlı əsgər Vüqar Əsgərovla tanış olub. Tezliklə əsgərləri hərbi hissəyə qaytarıblar  və az sonra qadının hamilə olduğu bilinib. İlk vaxtlar Vüqarla  yazışıblar, amma  sonra Vüqar  məktubları cavablandırmadığından əlaqə kəsilib. 1987-ci ilin yayında isə rus qadının 16 ildən sonra Məryəm adını alacaq qızı dünyaya gəlib...

Məryəmin atası haqda məlumatı o  qədər də çox deyil. Vüqar Əsgərov böyük ehtimalla 1965, yaxud 1966-ci ildə anadan olub. 1985-1986-çı illərdə Rusiyanın Qaraçay-Çərkəz Respublikasının (əvvəllər Stavropol diyarının tərkibində olub-S.L.) Zelençuk rayonunun Storejevaya kəndindəki 52563 saylı hərbi hissədə qulluq edib.

Müsəlman qız öz atası haqqında məlumatı  və ya onunla tanışlığı olan, bir yerdə hərbi xidmət keçmiş hər kəsdən  şəxsi elektron poçtuna yazmağı xahiş edir: [email protected]. Məryəm onu  da düşünür ki, yəqin ki, Azərbaycanda qardaş-bacıları da var və atalarını fotolarında tanıyacaqlar – qoy əlaqə yaratsınlar...