Miq.Az xəbər verir ki, dünənə qədər Sovet İttifaqına qarşı vuruşan və alman faşizminə dəstək verən Qaregin Njdeyə Qarabağda da abidə qoyan, faşizm üzərində qələbənin 75 illiyində iştirak etməmək üçün Moskvaya səfərdən müxtəlif bəhanələrlə yayınan Ermənistan hakimiyyəti rus sülhməramlıları ilə birgə guya 76-cı ildönümə "hazırlaşır”, "Ailə Tarixi - Zəfər Tarixi” adlı aksiyaya qoşulub.

Aksiya 1941-1945-ci illərdə Almaniyaya qarşı döyüşlərdə həlak olan keçmiş Dağlıq Qarabağ Muxtar Vilayətinin keçmiş Əsgəran rayonunun Xanabad kəndinin yerli 104 əsgərinin abidəsinin ziyarəti ilə start götürüb.

Maraqlıdır ki, Rusiya Müdafiə Nazirliyinin yaydığı məlumatda "gənc nəsil arasında Böyük Vətən müharibəsi mövzusuna marağı artırmaq və tarixin təhrif olunmasının qarşısını almaq məqsədilə” aksiyanın bir aydan çox davam edəcəyi bildirilib.

"Rusiya sülhməramlı kontingentinin hərbi qulluqçuları Qarabağdakı erməni müəllimlərlə birlikdə mütəmadi olaraq məktəblilər və tələbələrlə görüşəcək, cəsarət (kişilik) dərslərinin keçirilməsində mütəmadi olaraq iştirak edəcəklər”, - məlumatda qeyd edilib.

Zəruri olaraq qeyd edək ki, Azərbaycan Böyük Vətən müharibəsinə Ermənistandan fərqli olaraq, tarixinin şərəfli parçası kimi baxır. Ona görə də bu aksiyanın Ermənistanda keçirilməsi daha məqsədəuyğundur.

Rus sülhməramlılarının ermənilərə kişilik dərsi keçməyə çalışmasının, həm də bunu Azərbaycan ərazisində etməsinin özü qəribədir.(axar.az)