Taleh Bağırov haradadır?

"Taleh Bağırovun harada olması barədə hələlik məndə məlumat yoxdur".

Bunu Trend-ə T.Bağırovun vəkil Cavad Cavadov bildirib. Vəkilin sözlərinə görə, T.Bağırovla hələ görüşməyib və hazırda onun harada olması barədə məlumatı yoxdur.

Qeyd edək ki, ötən gün Bakı şəhərinin Nardaran qəsəbəsində bir qrup radikal islamçıya qarşı Daxili İşlər Nazirliyi tərəfindən xüsusi əməliyyat keçirilib. Əməliyyat zamanı polis əməkdaşlarına silahlı müqavimət göstərilərək avtomat silahlardan atəş açılıb, əl qumbarası atılıb. Hücum edənlərin davamlı atəşinə cavab olaraq xüsusi əməliyyat qrupu tərəfindən xidməti silahdan istifadə edilməklə cinayətkar dəstənin 4 üzvü məhv edilib, daha bir neçə nəfəri yaralanıb.

Əməliyyatın zamanı 2 polis əməkdaşı da həlak olub.

Hadisə yerindən maddi sübut kimi xeyli sayda avtomat silah, əl qumbarası, soyuq silahlar və s. götürülüb. Cinayətkar dəstənin, Taleh Bağırov başda olmaqla, 14 üzvü saxlanılaraq istintaqa təqdim edilib.

Fakt üzrə Azərbaycan Baş Prokurorluğu tərəfindən cinayət işi başlanılaraq istintaq aparılır.