Tanrım,bizə ayrılıq ver!

Afaq Şıxlı

Tanrım, mənə rahatlıq ver,
Ovut məni!
Nigaranlıq paylayanda
bir dəfə də unut məni!
Sevinərəm
bir az da tez alsan əgər öz yanına,
Son qoyular yaralanmış ürəyimin üsyanına.
Çabalarım, vuruşlarım getsə hədər,
Tanrım,
mənə yaşamaqüçün rahatlıq ver!

Bir elim var -
Süfrəsi də ürəyitək açıq elim.
Sərvətləri göz altında,
Torpaqları köz altinda,
Ümidleri uçuq elim!
Kim gəlibsə, qucağından hərə bir pay qoparıbdı.
Var-yoxunu hey daşıyıb aparıbdı.
Bir misqal da haqq-ədalət varsa əgər,
Tanrim, mənim Vətənimə
azadlıq ver!

Məni sevən bir anam var!
Gozləriylə qor götürüb,
Yanıb həyat ocağında.
Bu qədər də dərd olarmı,
Bircə dəfə can eşidib yatmamışam qucağında!
İncə, zərif ürəyində qubar vardır - yaşım qədər!
Tanrim, ona təskinlik ver,
sağlamlıq ver!

Bir eşqim var,
Yaranandan itən tayım...
Həm ömürlük qara sevdam,
Həm ömürlük həsret payım.
Bu dünyada yoxdu bəlkə bizi kimi iki təzad!
Sabahımız açılmayır
dünənki tək qəmdən azad.
Bu qismətsiz sevgimizi nə göy gizlər,
Nə də ki, yer!
Adiliyə öyrəşməyə qoyma bizi!
Tanrım, bizə ayriliq ver!
Ayrılıq ver!