“TRT Avaz” “Azərbaycan ulduzları” adlı proqram yayımlayacaq

İyunun 10-da Türkiyənin “TRT Avaz” telekanalının Bakı təmsilçiliyi tərəfindən hazırlanmış “Azərbaycan ulduzları” musiqi proqramının təqdimatı keçirilib.
“Vətəninfo.az” xəbər verir ki, Türkiyənin Azərbaycandakı səfirliyində təşkil olunmuş mərasimdə Milli Məclisin deputatları, elm, ədəbiyyat və mədəniyyət xadimləri iştirak ediblər.
Mərasimdə Türkiyənin Azərbaycandakı səfiri Hulusi Kılıç, “TRT Avaz” telekanalının Bakı təmsilçisi Yüksəl Dəyərcan və “Azərbaycan ulduzları” musiqi proqramının aparıcısı Arzu Əsgərova verilişin məqsədlərindən danışıblar. Onlar bildiriblər ki, bu proqram vasitəsilə türkiyəli tamaşaçılar Azərbaycanın mədəni həyatında baş verən yeniliklərdən xəbər tutacaq və qardaş ölkənin musiqisi ilə daha yaxından tanış olacaqlar.
Qeyd edək ki, 30 dəqiqəlik veriliş hər həftənin bazar günü saat 18:30-da efirə gedəcək.

Könül İbrahim