Xarici şirkət maşını Azərbaycan bayrağını nömrədən kəsib - FOTO

Yol tikintisi ilə məşğul olan yük maşınının nömrəsində AZ və bayraq hissəsi kəsilib.

Vətəninfo.az avtosfer.az saytına istinadən xəbər verir ki, şəkildə görünən ağırtonnajlı yük avtomobili Azərbaycanda yol tikintisi ilə məşğul olan xarici şirkətlərdən birinə məxsusdur. Foto Kürdəmir rayonu ərazisində iyulun 12-də çəkilib. Bu avtomobilin xarici şirkətə məxsus olduğu dövlət qeydiyyat nişanının avtomobilin üstündə qalan bir parçasından aydın olur.

Yəqin ki, bu şirkət ölkəmizdə iri həcmli investisiya layihələrindən birini həyata keçirir və yaxşı gəlir əldə edir. Amma bu avtomobil üzərində dövlət qeydiyyat nişanı yerindəki lövhə Azərbaycana qarşı açıq hörmətsizliyin ifadəsidir. Həmin dövlət qeydiyyat nişanı (nömrə nişanı) digər şəkildə gördüyünüz kimi olmalıdır. Müqayisə edəndə aydın olur ki, avtomobil üzərindəki lövhədən həm Azərbaycanın bayrağı, həm ölkəmizin beynəlxalq fərqlənmə nişanı olan «AZ» qeydi, həm də nömrənin seriyasını bildirən hərif qopub (və ya qoparılıb). Hər bir halda nəqliyyat vasitəsinin belə standartdan kənar «nömrə» ilə idarə olunması yol hərəkəti qaydalarının kobud şəkildə pozulması və ölkə qanunvericiliyinə hörmətsizlikdir.

Yəqin ki, DYP-nin aidiyyəti qurumu bu faktı araşdıraraq həmin avtomobilin «nömrəsinin» bu vəziyyətə gəlməsinin bilərəkdən və ya səhlənkarlıqdan edildiyini müəyyənləşdirəcək, buna yol verən şəxsləri məsuliyyətə cəlb edərək, onları daha diqqətli olmağa vadar edəcək.

Vətəninfo.az