Afaq Şıxlı Azərbaycan Jurnalistlər Birliyinin üzvü oldu

Həsrətlə gözlədiyimiz baharın ilk günü soyuq və qarlı Moskvada yaşayan şairəmiz Afaq ŞIXLI üçün uğurla və sevinclə başlayıb.
Kövrək şeirlərin, dəyərli publisistik yazıların və maraqlı hekayələrin müəllifi olan Afaq xanım Azərbaycan Jurnalistlər Birliyinin üzvü olub.
Qeyd etmək istəyirik ki, yaxın günlərdə şairənin daha iki yeni: “Dostlarım, mənə də bahar göndərin!” (türk), “Ömrümün beşinci fəsli” (azərb.) adlı kitabları işıq üzü görəcək.
Afaq Şıxlının son şeirlərindən birini oxuculara çatdırmaq istəyirik.

...BIR DƏ, SƏNIN DÖNÜKLÜYÜN

Ruhu itmiş bədən kimi dolaşıram.
Sənsizlikdə
boş yerini doldurmağa çalışıram.
Yeni zinət əşyaları.... təzə paltar...
Evimə də yeni-yeni şeylər alıb,
Hər bir yanı süsləmişəm, yanır par-par.
Gör bir nəylə ürəyimi soyuduram!
Fərqi nədir?
Nə etsəm də, nə alsam da
Otağıma yenə sənsiz qayıdıram.
O axşamdan, məni tamam dəyişiblər...
Həsrət, yalan, bir də sənin dönüklüyün -
əlbir olub ürəyimlə döyüşüblər
Uduzmuşam!
Sənə - dinclik, mənə - zülüm,
Bölüşüblər.
Gələcəyə nə qədər ki, arzu vardı,
Gözümüzə baxa-baxa yox eləyib
Arxamızca gülüşüblər...
Ruhu itmiş bədən kimi dolaşıram.
Ölü olub,
diri kimi görünməyə çalışıram