Vətəninfo.az Avropa.info-ya istinadən xəbər verir ki, Türkiyə Azərbaycan Dərnəkləri Dostluq federasiyasının İğdır Azərbaycan Evi Dərnəyinin rəhbəri Sərdar Ünsal Tuzluca rayonunun giriş və çıxışında "xoş gəlmisiniz" və "gülə-gülə" yazılarına sərt reaksiya göstərib. 

Ünsal Türkiyədə Erməni heyranlığının hər keçən gün artdığını vurğulayaraq təəssüf ki, bu heyranlıq İğdıra, Tuzluca rayonuna qədər gəlib çatdığını söyləyib. 

"Bələdiyyə başçısının dörd dildə xoş gəldin yazısının içinə erməni dilini də qatmasını anlaya bilmirik. Hörmətli bələdiyyə başçısı çox yaxşı bilir ki İğdıra erməni turist gəlmir. İndiyə qədər də heç vaxt gəlməmişdir. Gələn turistlərin başında Azərbaycan türkləri və iranlılar var. Ermənilərin yerinə iranlılar üçün farsca yaza bilərdi." 

Onun dediklərinə görə ermənilərin 1915-1920-ci illər arasında Şərqi Anadolu bölgəsində etdikləri soyqırımlardan Tuzluca rayonunun Çatlı, Mollakamer, Güllüce kəndləri də öz nəsibini almışdır. 

"Tuzluca rayonu erməni vəhşiliyinin ən şiddətlisini yaşamışdır. Erməni şəbəkələri 1915-1920 illəri arasında Tuzlucadaki müsəlman xalqı, türk, kürd deyə ayırmadan sırf müsəlman olduqları üçün qətl etdi. Tuzluca rayonunda yazılan yazı şəhidlərimizin sümüklərini sızladır."