Badamdar sakinləri üçün kitab yarmarkası təşkil edilir

“Səyyar kitab”ın növbəti dayanacağı Badamdar Mədəniyyət Evi olacaq

Bakı Şəhər Mədəniyyət və Turizm İdarəsi ilə “Hədəf Nəşrləri”nin birgə gerçəkləşdirdiyi kitab sərgi-yarmarkaları yay fəslində də davam edəcək.

Hədəf Nəşrlərinin mətbuat xidmətindən verilən məlumata görə, artıq 3 aydır ki, bu işlər “Səyyar kitab” layihəsi çərçivəsində həyata keçirilir. Layihə çərçivəsində növbəti sərgi iyunun 9-da Badamdar Mədəniyyət evinin qarşısında baş tutacaq. 

Sərgi-yarmarka saat 11:00-dan saat 18:00-a qədər davam edəcək, Badamdar sakinləri həm minlərlə adda müxtəlif nəşr nümunələri ilə tanış olmaq, həm də ucuz qiymətə kitab almaq imkanı qazanacaqlar.

Kitab sərgisinin məqsədi sakinlərin kitab aləmində olan yeniliklərdən xəbərdar etmək və onlara lazım olan müxtəlif kitab və dərs vəsaitlərinin güzəştli qiymətlərlə satışını gerçəkləşdirməkdir.

Sərgidə təqdim olunan kitablar arasında həm yerli nəşrlərə, həm də xarici ölkələrdə nəşr olunan rus, ingilis və türk dilində olan kitablara, dərs vəsaitləri və digər nəşr nümunələrinə də rast gəlmək mümkün olacaq. “Səyyar Kitabın” təqdim etdiyi məhsullar arasında ali məktəblərə və magistraturaya hazırlaşan gənclər üçün əhəmiyyət daşıyan vəsaitlər də olacaq. 

Layihədə iştirak etmək istəyən başqa qurumlar və ya şəxslər (012) 596-66-95 nömrəli telefon vasitəsi ilə əlaqə saxlaya bilərlər.