Bəzi dərman vasitələri satışdan çıxarıla bilər

Bəzi dərmanların respublikaya idxalı və apteklərdə satışı qadağan olundu. Bu məsələ Səhiyyə Nazirliyi Farmakoloji və Farmokopeya Ekspert Şurasının iclasında müzakirə edilib.

İclasda “Lirika” və “Koaksil”, “Tropin” və “Midriasil” dərman preparatlarının dövlət qeydiyyatının ləğv olunması və aptek şəbəkəsindən satışdan çıxarılması, “Oktaqam” preparatının dövlət qeydiyyatının bərpa olunması və s. bildirilib.

“Lirika” və “Koaksil” dərman preparatlarının respublikaya idxalı bu preparatların fayda və risk nisbətləri monitorinqi və araşdırmaları tam qiymətləndirilənə qədər dayandırılması və dövlət qeydiyyatından çıxarılması qərara alınıb. Eyni zamanda, “Tropin” və “Midriasil” dərman preparatları dövlət müəssisələrində işlənən əsas dərman preparatlarının siyahısına daxil edilib və aptek şəbəkəsindən satışdan çıxarılıb. Buna səbəb adıçəkilən dərman vasitələrindən asılı şəxslərin ailə üzvlərinin, hüquq-mühafizə orqanlarının Respublika Narkoloji Mərkəzinə dəfələrlə edilən müraciətləri, xəstələr arasında rast gələn sui-istifadə və ağırlaşma hallarının müşahidə olunmasıdır.

“Oktaqam” (normal insan immunoqlobulini) dərman vasitəsinin istehsalçısı tərəfindən göstərilən problemlərin aradan qaldırılması və yaranma səbəblərinin öyrənilməsi başa çatdığı üçün isə bu preparatın dövlət qeydiyyatının bərpa edilməsinə dair qərar qəbul edilib.

Rəqsanə Yusifzadə