Biri getdi, biri qaldı - Açıqlama

“Gülər Əhmədova Yeni Azərbaycan Partiyasının üzvüdür. Bəzi mətbuat orqanlarında yazıldığı kimi, YAP Siyasi Şurasının üzvü deyil”.

Fəaliyyəti dayandırılmış Azərbaycan Beynəlxalq Universitetinin sabiq rektoru Elşad Abdullayev Yeni Azərbaycan Partiyasının (YAP) sıralarından xaric edilib. Modern.az-ın məlumatına görə, bu barədə hakim partiyanın İcra katibinin müavini, millət vəkili Siyavuş Novruzov bildirib. O qeyd edib ki, məlum qalmaqaldan sonra Elşad Abdullayev partiya üzviliyindən çıxarılıb.

S.Novruzov daha sonra bəyan edib ki, Yeni Azərbaycan Partiyası parlament seçkilərinə heç vaxt Elşad Abdullayevin namizədliyini dəstəkləməyib.

Qeyd edək ki, ABU-nun sabiq rektoru hakim Yeni Azərbaycan Partiyasının Binəqədi rayon təşkilatının üzvü idi.

Gülər Əhmədova YAP-dan çıxarılmayıb

“Gülər Əhmədova Yeni Azərbaycan Partiyasının üzvüdür. Bəzi mətbuat orqanlarında yazıldığı kimi, YAP Siyasi Şurasının üzvü deyil”.

Bunu YAP icra katibinin müavini, millət vəkili Mübariz Qurbanlı bildirib. M. Qurbanlı G. Əhmədovanın YAP Yasamal rayon təşkilatının üzvü olduğunu xatırladıb: “Onun partiyada qalıb-qalmaması məsələsi partiya nizamnaməsinə uyğun şəkildə həll olunacaq. Bu məsələ rayon təşkilatında müzakirə olunacaq və müvafiq qərar qəbul ediləcək. Onun guya YAP-dan çıxarılması barədə bəzi mətbuat orqanlarında verilən məlumatlar doğru deyil. Bununla bağlı kimlərsə açıqlama verib, lakin bunlar yanlışdır. Partiyanın mövqeyini yalnız mətbuat xidməti və aparata daxil olan şəxslərin ifadə edə bilər”.

APA