DÇ-də məğlub olan komandaların məşqçiləri istefa etdi

Braziliyadakı dünya çempionatında uğursuz çıxışdan sonra Yaponiya millisinin italyan baş məşqçisi Alberto Dzakkeroni istefa verib.

Vətəninfo.az xəbər verir ki, Dzakkeroninin istefası barədə Yaponiya Futbol Federasiyası bu gün rəsmi bəyanat verib. 2010-cu ildən Yaponiya millisinə başçılıq edən Dzakkeroninin müqaviləsi bu il başa çatırdı.

Qeyd edək ki, Yaponiya millisi “C” qrupunda sonuncu yeri tutaraq, mundialla erkən vidalaşıb. 

Bu arada İran millisinin portuqaliyalı baş məşqçisi Karluş Keyruş da istefa verib. Bu haqda təcrübəli məşqçi dünya çempionatında qrup mərhələsinin Bosniya və Hersoqovina yığmasına qarşı son oyunundakı məğlubiyyətdən (1:3) sonra açıqlama verib.

“Mənim üçün İran yığması ilə işləmək şərəf idi. Mən bu ölkəyə vuruldum. Amma tərəflərdən yalnız birinin razı olduğu halda hansı “toy”dan söhbət gedə bilər. Mən gözləyirdim ki, yeni təklif gələcək. Amma olmadı. İran futbolu, futbolçularım və azarkeşlər hər zaman qəlbimdə olacaqlar”, - deyə Karluş Keyruş deyib.

Qeyd edək ki, İran millisi dünya çempionatının “F” qrupunda Argentina, Bosniya və Hersoqovina yığmalarına məğlub olub, Nigeriya yığması ilə heç-heçə edib. Bu nəticə ilə iranlılar qrupda sonuncu yeri tutublar.

Vətəninfo.az