“Erməni Azərbaycanı dərhal tərk etməsə...”

Qarabağ Azadlıq Təşkilatı (QAT) Ermənistanın nümayəndəsinin, İrs partiyasının sədri Raffi Ovannisyanın Asiya Ölkələri Siyasi partiyalarının Bakıda keçirilən toplantısında iştirakı ilə bağlı bəyanat yayıb. QAT-dan verilən məlumata görə, bəyanatda Ermənistanın nümayəndəsinin Azərbaycana səfəri yolverilməz hesab edilib: “Raffi Ovannisyanın səfəri heç bir ölçüyə sığmır. Bu partiya daim Azərbaycana qarşı həyasız bəyanatlarla çıxış edib, Ermənistan parlamentində bir neçə dəfə Dağlıq Qarabağdakı qondarma rejimin tanınması təklifləri və qanun layihələri ilə çıxış edib. Raffi Ovanisyan Bakıya gələn kimi də öz mövqeyini nümayiş etdirməkdən çəkinməyib, həyasız bəyanatlarla çıxış edib, Sumqayıtı erməni şəhəri hesab etdiyini, Dağlıq Qarabağın işğalı faktını rədd etdiyini bildirib. Biz öz tərəfimizdən işğalçı Ermənistanın həyasız nümayəndəsinin ölkəni dərhal tərk etməsi üçün bütün vasitələrdən istifadə edəcəyik”.
ATƏT-in Minsk Qrupunun həmsədrləri Robert Bradtke, İqor Popov və Jak For, həmçinin ATƏT-in fəaliyyətdə olan sədrinin şəxsi nümayəndəsi Anjey Kaspşik Azərbaycanın erməni işğalı altında olan Dağlıq Qarabağ regionuna gediblər.Vasitəçilər bu gün Xankəndidə separatçı rejimin rəhbəri Bako Saaakyanla görüşüblər. Görüşdə Dağlıq Qarabağ münaqişəsinin nizamlanmasına dair məsələlər və regiondakı son vəziyyət müzakirə olunub. Həmsədrlər Dağlıq Qarabağdan İrəvana qayıdacaqlar. Onların Bakıya səfəri gələn həftəyə nəzərdə tutulur.