İsraildən Rusuya Telekanalına raket zərbəsi

İsrail bazar günü yenidən Qəzza sektorunda bir sıra hədəflərə zərbə endirib.

“Veteninfo.az”ın Teleqraf.com-a istinadən verdiyi xəbərinə görə, Qəzza şəhərində "Əl Şəva" biznes-mərkəzinə atılan raketlərdən biri həmin binanın 11-ci mərtəbəsində yerləşən RussiaToday telekanalının ofisinə düşüb və oranı tamamilə dağıdıb. Raket atılan zaman telekanalın əməkdaşları ofisdə olmayıb.

Russia Today-la yanaşı həmin binada yerləşən və HƏMAS hərəkatına yaxın olan "Əl Qüds" telekanalının studiyası da raket zərbəsinə məruz qalıb. Bir neçə jurnalist yaralanıb. Hadisə baş verən zaman "Əl Qüds" telekanalının studiyasında olan jurnalist Məhəmməd Astal deyib: "Hamıya aydın idi ki, binada jurnalistlər yerləşib. Aydın görünürdü ki, bu binada televiziyalar fəaliyyət göstərir. Biz səhər binaya raket düşdüyünü eşidəndə şokda idik. Təcili binanı tərk etdik".

 Fələstinin "Maan" agentliyinin məlumatına görə, bir çox beynəlxalq media quruluşlarının, o cümlədən Sky News, İTV, Russia Today-ın, eləcə də Fələstin xəbər agentliklərinin yerləşdiyi binaya ümumilikdə 4 raket atılıb. Nəticədə 6 jurnalist yaralanıb.