Klaypeda limanına bütün tarixi ərzində ən böyük gəmilər yan alıb

2015-ci ilin iyununda Klaypeda limanına bütün tarixi ərzində ən iri gəmi - 324,8 metr uzunluğunda konteynerdaşıyan "MSC Charleaton” gəmisi yan alıb. Amma cəmi iki ay sonra bu rekord təzələnib: avqustun 11-də Klaypeda limanı uzunluğu 336,68 metr, eni 45,60 metr olan "MSC Asya” gəmisini qəbul edib.

Klaypeda Dövlət Dəniz Limanı direksiyasının baş direktoru Arvidas Vaytkus deyib: "İndiyədək okean gəmilərinə xidmət və konteynerlərin transşipment adlanan daha xırda gəmilər arasında bölüşdürülməsi funksiyasını Qərbi Avropanın Rotterdam, Antverpen, Hamburq və s. kimi daha iri limanları yerinə yetirirdi. Bundan sonra Klaypeda limanı da fider gəmilərlə yanaşı, konteynerdaşıyan okean gəmilərinə xidmət göstərəcək.. Bunu konteynerdaşıyan gəmilərin limana daxil olması sübut edir. Əminik ki, okean gəmilərinin limanımıza axını günbəgün artacaq”.

Yaxın gələcəkdə Klaypeda limanında konteynerlərin Baltik dənizinin digər regionlarının limanlarına yük daşıyan fider gəmilərinə paylaşdırılması nəzərdə tutulub. Bunula da başqa materiklərdən regiona konteynerlər daşıyan böyük gəmilərin Qərbi Avropanın ənənəvi limanlarında aralıq yük boşaltmalarına ehtiyac qalmayacaq.