“Məhəbbətin sirri”

Tibb elmləri doktoru, professor Rüstəm Rüstəmovun yeni monoqrafiyası - “Məhəbbətin sirri” kitabı “Nurlar” nəşriyyatı tərəfindən çap edilib.

Nəfis tərtibatda çapdan çıxmış bu nəşrdə müəllifin “məhəbbət” fenomeninə həsr olunmuş tədqiqatları yer alıb. Kitabda humanitar və təbiət elmlərinin nailiyyətləri ümumiləşdirilərək, məhəbbət hissinin yaranması ilə insanın varlığında baş verən dəyişikliklər ətraflı şərh olunub. Professor Rüstəm Rüstəmov “məhəbbət” anlayışının ibtidai insan qruplarında yaranmasını, cəmiyyətin inkişaf mərhələlərinə uyğun olaraq təkamülünü, insanın genetik və mədəni irsiyyəti ilə əlaqəsini, din və ictimai əxlaq normaları daxilində müxtəliflik qazanmasını, həmçinin insanların davranışına təsiri məsələlərini maraqlı şəkildə izah edib.
Filologiya üzrə fəlsəfə doktoru Elçin Cabbarovun elmi redaktorluğu ilə nəşr olunmuş bu kitab psixoloqlar, sosioloqlar, həmçinin geniş oxucu auditoriyası üçün nəzərdə tutulub.

AZƏRTAC