Milli mətbuatımız ağır, keşməkeşli və şərəfli yol keçib

Ceyhun Ələkbərov: 140 illik yubileyini qeyd edən Azərbaycan mətbuatı Dağlıq Qarabağ münaqişəsinin həlli istiqamətində həyata keçirilən siyasətin təbliği məsələsində daha aktiv olmalıdır
"Bu gün ermənilərin Qafqazda yürütdüyü işğalçılıq siyasəti, Ermənistanın hərbi təcavüzü nəticəsində ölkəmizin müvəqqəti də olsa torpaq itkisi ilə üzləşməsi, həmçinin, qaçqın və məcburi köçkünlərin pozulan hüquqları ilə bağlı məsələ dünya mətbuatında istənilən səviyyədə işıqlandırılmır”. Bunu "Soyqırımı Həqiqətlərinin Tanıdılması” İctimai Birliyinin sədri Ceyhun Ələkbərov deyib.
Bu istiqamətdə jurnalistlərimizin üzərinə böyük məsuliyyət düşdüyünü deyən C.Ələkbərov onu da əlavə edib ki, 140 illik yubileyini keçirən milli mətbuatımız ağır, keşməkeşli və şərəfli yol keçib. O, mətbuatımızın müasir inkişafının Ulu öndər Heydər Əliyevin adı ilə bağlı olduğunu deyib: "Ümummilli lider Heydər Əliyevin Azərbaycanda mətbuat üzərində senzuranı ləğv etməsi Onun azad sözə, fikir azadlığına, ümumilikdə jurnalistikaya olan qayğısının nəticəsi idi. Mətbuat tarixində bu cür humanist addımlara görə "Jurnalistlərin dostu” seçilən Ulu öndər Heydər Əliyevin əsasını qoyduğu siyasəti Prezident İlham Əliyev uğurla davam etdirir. Mətbuat işçilərinin mənzil probleminin həlli, hər il onlarla jurnalistin müxtəlif fərmanlarla təltif edilməsi bunun bariz nümunəsidir”.
Azərbaycanda fikir və söz azadlığının yüksək səviyyədə təmin edildiyini deyən "Soyqırımı Həqiqətlərinin Tanıdılması” İctimai Birliyinin sədri Ceyhun Ələkbərov bununla yanaşı onu da vurğulayıb ki, bəzən bu azadlıqdan sui-istifadə edən bəzi dırnaqarası jurnalistlər də tapılır.
Ümumilikdə Azərbaycan mətbuatının bugünkü vəziyyətinin qənaətbəxş olduğunu vurğulayan QHT sədri eyni zamanda, bir vacib məqama da toxunub. O, qeyd edib ki, hazırda dünyada informasiya müharibəsi hökm sürür, ona görə də biz Ermənistan - Azərbaycan, Dağlıq Qarabağ münaqişəsi məsələsində haqqımızın tələbi baxımından mətbuatımızdan daha səmərəli addımlar gözləyirik: "Texnologiya o qədər sürətlə inkişaf edib ki, istənilən informasiya bir dəqiqə ərzində bütün dünyaya yayılır. Böyük dövlətlər kiçik ölkələrə məhz bu vasitə ilə savaş açır. Balaca bir dezinformasiya, məqsədli şəkildə yazılan kiçik məlumat bir çox böyük məsələləri həll edə bilir və ya hansısa dəyişikliyə imza atır. Nəzərə alsaq ki, Azərbaycan da informasiya müharibəsinin aktiv "kart”ıdır, o zaman mətbuat işçiləri bu istiqamətdə ölkə rəhbərliyinin yaratdığı şəraitdən səmərəli yararlanmalıdır. 140 illik yubileyini qeyd edən Azərbaycan mətbuatı Dağlıq Qarabağ münaqişəsinin həlli istiqamətində həyata keçirilən siyasətin təbliği məsələsində daha aktiv olmalıdır. Çünki biz Azərbaycanda sözün və qələmin gücünü yaxşı dərk edirik, əks halda bu mətbuatın 140 il kimi uzun bir tarixi keçmişi olmazdı. Öz növbəmdə mən də Azərbaycan mətbuatına, ölkəmizdə söz, fikir azadlığına neçə belə və daha uğurlu 140 illiklər arzu edirəm”.