Qarabağda öz başdaşını gözləyən sənətkar - Video

Bu gün Azərbaycanın bənzərsiz səsə malik xanəndəsi Səxavət Məmmədovun anım günüdür.
1953-cü il 23 oktyabrda dünyaya gələn Səxavət Məmmədov 38 illik ömründə – bu qısa zaman kəsiyində öz adını Azərbaycan mədəniyyətinin nəhəng simaları ilə bir sıraya yazdıra bilib.
 Onun ifasında "Külək, niyə belə əsirsən?”, "Yar bizə qonaq gələcək”, "Sarı bülbül”, "Azad bir quşdum” kimi mahnılar ölümsüzlük qazanıb.
Qardaşı Firuz Səxavət mərhum xanəndənin təkcə sənətkar kimi yox, bir insan kimi də hamıya doğma olduğunu deyir:
"Səxavəti tanıyanlar onun necə bir insan olduğunu bilirlər. Səxavət çox həssas insan idi. Ona pislik etmək istəyənlərə yaxşılıq edirdi. Səxavət belə bir ürəyigeniş insan idi. Ona görə də vaxtilə paxıllığını çəkənlər sonradan onu çox istəyirdi. Mən tez-tez el şənliklərində, tədbirlərdə xalqımızın içində oluram. Hara gedirəmsə, onun haqqında ancaq tərif eşidirəm. Özüm də məəttəl qalıram və fəxr edirəm ki, Səxavəti bu qədər sevirlər”.