"Bu qərar onu göstərir ki, Amerikada lobbimiz hələ də zəifdir”

ABŞ Azərbaycanı vertolyotlar üçün hərbi avadanlıqlar alan ölkələr siyahısından çıxarması bir daha göstərir ki, bu ölkədəki lobbimiz hələ də zəifdir.

Bu sözləri “Vətəninfo.az”a “Diaspor və Lobbi” Elmi Araşdırmalar Mərkəzinin sədri, analitik, Dr. Zaur Əliyev ABŞ Azərbaycanı vertolyotlar üçün hərbi avadanlıqlar alan ölkələr siyahısından çıxarmasını şərh edərkən  bildirib.

“ABŞ Azərbaycanlıları şəbəkəsi USAN-da Konqresə müraciət göndərərək Azərbaycana hərbi avadanlıqlar satılmasına icazə verilməsinə dair Dövlət Departamentinin təklifini dəstəkləməsi də erməni lobbisinin gücünü zəiflətmək imkanlarının az olduğunu aşkara çıxarır”,-deyə analitik qeyd edib.

Analitik eyni zamanda hesab edir ki, bu qərar Amerikanın maraqlı olduğu enerji infrastrukturunu təhlükə altına almış olur: “Amerikanın hərbi avadanlığını almaq hüququna malik ölkələrin siyahısından Azərbaycanın çıxarılması regiondakı böyük layihələri mühafizəsiz qoymağa yönəlik addım kimi qiymətləndirmək olar. Hesab edirəm bu qərardan Amerika biznesi də zərər çəkə bilər. İran-Azərbaycan münasibətlərinin ən gərgin günlərində də bu qərarın qəbul olunması regionda Amerika şirkətlərinin özünü də təhlükəyə sala bilər”,-deyə Zaur Əliyev vurğulayıb.

Elnur Eltürk