Rusiya “Türk axını”nın birinci xətt üzrə hökumətlərarası layihəsini Türkiyəyə göndərib

Rusiya "Türk axını”nın birinci xətt üzrə hökumətlərarası layihəsini Türkiyəyə göndərib.

 

Vətəninfo.az xəbər verir ki, "APA-Economics”in RİA "Novosti”yə istinadən verdiyi məlumata görə, bu barədə jurnalistlərə Rusiyanın Energetika Nazirliyindən məlumat verilib.

 "Rusiya tərəfi "Türk axını” layihəsinin birinci xətt üzrə təkliflərini hazırlayaraq Türkiyə tərəfinə göndərib”, - deyə bildirilib.

 "Türk axını” layihəsi çərçivəsində ildə 63 mlrd. kubmetr qazın Qara dəniz vasitəsilə Rusiyadan Türkiyəyə göndərilməsini nəzərdə tutan boru xətti inşa olunacaq. Boru xətti 4 xətdən ibarət olacaq və 47 mlrd. kubmetr qazı Türk-Yunan sərhədinə daşıyacaq.

 "İlkin mərhələdə "Türk axını”nın kompleks inşası üçün hökumətlərarası sazişin hazırlanması və imzalanması planlaşdırılır ki, o da bütün 4 xəttin inşasını sürətləndirməyə yardım edəcək. Lakin, Türkiyə və Rusiya arasında iyunda Bakıda keçirilən son görüşdə tikintinin mərhələlərlə davam etdirilməsinə qərar verilib”, - deyə məlumatda vurğulanıb.

 "Biz addım-addım getməyə hazırıq. Rusiya tərəfi bir xətt üzrə ilkin təkliflərini hazırlayıb. İkinci, dördüncü xətlər üzrə isə hökumətlərarası ayrı-ayrı razılaşmalar olacaq”, - deyə mətbuat xidmətindən bildirilib və əlavə olunub ki, "Türk axını”nın ilk xətti Türkiyə tərəfinin ehtiyaclarının ödənilməsi məqsədini daşıyır.