Rusiya və İsrail faktiki olaraq bloger Aleksandr Lapşinin Azərbaycana ekstradisiyasına mane olmaq üçün səyləri birləşdiriblər.

İstiPress-in məlumatına görə, bu barədə "İnterfaks” agentliyinə etibarlı mənbə bildirib.

Mənbə bildirib ki, hər iki ölkənin vətəndaşlığını daşıyan Lapşinin Belarus tərəfinin təhvil verilməsi barədə qərar qəbul etməsindən sonra Rusiya və İsrail nümayəndələri onun sonrakı taleyinə dair daha intensiv təmaslara keçiblər.

Rusiya və İsrail səfirləri üçüncü ölkələrin ərazilərində danışıqlar apardığını qeyd edən mənbə bildirib ki, burada söhbət Aleksandr Lapşinin ekstradisiyasını və onun cinayət məsuliyyətinə cəlb olunmasına mane olmaq üçün səylərin birləşdirilməsindən gedir.

Xatırladaq ki, Aleksandr Lapşin ötən ilin dekabr ayının 16-da Minskdə Azərbaycanın sorğusu əsasında saxlanılıb. Ayrı-ayrı dövlətlərin vətəndaşlığını daşıyan A.Lapşin Ermənistan silahlı qüvvələri tərəfındən Azərbaycanın işğal olunmuş ərazilərində yaşayan digər şəxslərlə qabaqcadan əlbir olub cinayət əlaqəsinə girərək "Azərbaycan Respublikasının dövlət sərhədi haqqında”, "Pasportlar haqqında” Azərbaycan Respublikası qanunlarının tələblərini kobud surətdə pozmaqla Azərbaycanın mühafizə olunan dövlət sərhədini müəyyən edilmiş sənədlər olmadan və nəzarət-buraxılış məntəqələrindən kənarda keçərək 2011-ci ilin aprel və 2012-ci ilin oktyabr aylarında işğal olunmuş ərazilərə daxil olub.

O, qanunsuz rejimin beynəlxalq səviyyədə təbliğ edilməsi məqsədilə internet sosial şəbəkəsində özünə məxsus "http//puerrtto.livejournal.com” səhifəsində səyahət etdiyi dövlətlər arasında Azərbaycan və Ermənistanla yanaşı, Dağlıq Qarabağı da müstəqil dövlət kimi qeyd edib. Həmçinin 6 aprel və 29 iyun 2016-cı il tarixli müraciətlərində işğal olunmuş ərazilərdə qanunsuz fəaliyyət göstərən rejimin "müstəqilliyini” dəstəkləməklə Azərbaycanın beynəlxalq səviyyədə tanınmış ərazi bütövlüyünün parçalanmasına yönələn açıq çağırışlar edib.

Onun sözlərinə görə, A.Lapşinin Azərbaycana ekstradisiya edilməsi üçün sənədlər Baş Prokurorluq tərəfindən Belarus hüquq-mühafizə orqanlarına təqdim olunub.

A.Lapşinin hərəkətlərində dövlət əleyhinə yönələn açıq çağırışlar və dövlət sərhədini qanunsuz olaraq keçmə əməllərinin tərkib əlamətləri olduğundan Baş Prokurorluğun Ağır Cinayətlərə Dair İşlər Üzrə İstintaq İdarəsində fakta görə, Azərbaycan Cinayət Məcəlləsinin 281.2 (dövlət əleyhinə yönələn açıq çağırışlar) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi qaldırılıb və barəsində dövlətlərarası axtarış elan edilib.

Azərbaycanın Cinayət Məcəlləsi ilə A.Lapşini nə gözləyir?