Sergey Lavrov azərbaycanlı girovları və erməni əsirləri dəyişməyə çağırdı

Rusiyanın xarici işlər naziri Sergey Lavrov Ermənistana və Azərbaycana müraciət edib. "Rusiya münaqişə zonasında etimad yaratmaq üçün əsirləri hamının hamıya” prinsipi ilə dəyişdirilməsinə tərəfdardır.

Cebhe.info-nun məlumatına görə, Sergey Lavrov keçirdiyi mətbuat konfransında belə deyib.

"Biz həmişə bütün vəziyyətlərdə belə halların humanitar həllinə tərəfdarıq. Meyitlər, hərbi əsirlər, fərdi şəxslər "hamının hamıya” prinsipi ilə dəyişdirilməlidir. Biz hesab edirik ki, bu, istər Yaxın Şərqdə, istər Dağlıq Qarabağda, istərsə də cənub-şərqi Ukraynadakı münaqişə bölgəsində etimad mühitinin yaranmasını təmin edəcək”,-Lavrov belə deyib.

Qeyd edək ki, Azərbaycan 2018-ci ilin noyabr ayında əsir və girovların "hamının hamıya” prinsipi ilə dəyişdirilməsi təklifini irəli sürsə də, Paşinyan hökuməti bundan imtina etmişdi.

Azərbaycan və Ermənistanın xarici işlər nazirlərinin aprelin 15-də Moskvada keçirilmiş görüşündə əsir və girovların ailə üzvləri ilə görüşünə şərait yaradılması barədə razılıq əldə edib.

Hazırda Azərbaycan tərəfinin iki nəfər mülki vətəndaşı beş ildir ki, ermənilərin girovluğundadır. Kəlbəcər rayon sakinləri Şahbaz Quliyev və Dilqəm Əsgərov hazırda Şuşa həbsxanasında saxlanılır.

Azərbaycanda isə üç nəfər Ermənistan vətəndaşı olan hərbçi əsirlər saxlanılır. Onlar Arsen Baqdasaryan, Karem Kazaryan və Zaven Karapetyandır.