Siyavuş Novruzov: 'Deyirlər ki, namizədliyim qanunla qadağan olunur, bu, harada yazılıb?'

Siyavuş Novruzov: "Deyirlər ki, namizədliyim qanunla qadağan olunur, bu, harada yazılıb?"

Tarix: 03.07.2024 15:15
Baxış sayı: 641

Milli Məclisin Regional məsələlər komitəsinin sədri Siyavuş Novruzov növbədənkənar parlament seçkilərində namizədliyinin irəli sürülməyəcəyi, deputat olmaq istəmədiyi barədə iddialara aydınlıq gətirib.

S.Novruzov Pravda.az-a açıqlamasında belə deyib:

"Bir dəli quyuya daş atıb, min ağıllı yığışıb, hələ çıxara bilmir. Bu gün Yeni Azərbaycan Partiyasının Mərkəzi Seçki Qərargahını yaradıblar. Mən də oranın üzvüyəm. Sonuncu prezident seçkilərində də Qərargahın üzvü idim. Öz təcrübəmlə, işimlə, köməyimlə çalışıram ki, seçki prosesinə dəstək olum. Proqramlar yazılır, müşahidəçilər təyin edirik və s. Burada kifayət qədər təcrübəli insanlar olmalıdır ki, prosesi həyata keçirsinlər. Yeni Azərbaycan Partiyası həmişə məni bu məsələlərdə Mərkəzi Seçki Qərargahına təyin edir. İndi biri Mərkəzi Seçki Komissiyası ilə Mərkəzi Seçki Qərargahını səhv salıb. Mən MSK-ya üzv seçilməmişəm. Partiyanın işi seçki keçirməkdir. Deyirlər ki, namizədliyim qanunla qadağan olunur. Bu hansı qanunda yazılıb? Tamamilə iftiradır, yalandır”, - o qeyd edib.

****

VI çağırış Milli Məclisin deputatları Siyavuş Novruzov və Sevinc Hüseynovanın növbədənkənar parlament seçkilərində namizədliyini irəli sürə bilməyəcəkləri barədə məlumat yayılıb.

Buna səbəb onların adının Milli Məclisə 2024-cü il sentyabrın 1-nə təyin edilmiş növbədənkənar seçkilərlə əlaqədar Yeni Azərbaycan Partiyasının Mərkəzi Seçki Qərargahının tərkibinə daxil edilməsi göstərilir.

Miq.az xəbər verir ki, Siyavuş Novruzov Modern.az-a açıqlamasında xəbəri təkzib edib:

"Mən Yeni Azərbaycan Partiyasının Mərkəzi Seçki Qərargahının üzvüyəm, seçki komissiyasının deyil. Bu xəbər yalandır. Seçki komissiyasının tərkibinə daxil edilsəydim, onda namizədliyimi irəli sürə bilməzdim. Amma indiki halda namizədliyimi irəli sürə bilməyəcəyim haqda xəbər kökündən yanlışdır. Mərkəzi Seçki Qərargahının üzvləri arasında elə deputatlar da olmalıdır. Bu xəbər mənə qarşı açıq-aydın təxribatdır”.