“Tanınmayan və separatçı bir rejimlə görüş cinayət faktıdır”

Azərbaycan Uruqvaya etiraz notası verməli və Xorxe Oriko persona non qrata elan edilməlidir, onun Azərbaycana hər hansı bir səfərini qadağa qoyulmalıdır. Azərbaycan sərhədlərini qanunsuz keçən, qiyamçı və separatçı rejimlə əlaqəsi olan hər bir kəsə bu şamil edilməlidir.

Bu sözləri “Veteninfo.az”a "Tolerantlıq" İctimai Birliyinin rəhbəri, siyasi təhlilçi Azər Rəşidoğlu Uruqvay parlamentinin spikeri Xorxe Orikonun separtçı Dağlıq Qarabağ rejiminə səfər etməsini şərh edərkən bildirdi:

“Ümumiyyətlə Azərbaycan beynəlxalq təşkilatlar qarşısında bu məsələni qaldırmalıdır. Azərbaycanın icazəsi olmadan, heç kəs onun sərhədlərini keçə bilməz. Tanınmayan və separatçı bir rejimlə görüş isə cinayət faktıdır. Bu baxımdan Azərbaycan BMT səviyyəsində məsələni qaldırmalı və belə səfərlərə son qoyulmasını tələb etməlidir. Uruqvay parlamentinin sədri faktiki olaraq cinayət törədib və bu barədə beynəlxalq qanun və konvensiyaların verdiyi imkanlardan bəhrələnməliyik”-deyə siyasi şərhçi qeyd etdi.

Elnur Eltürk