Türk şirkəti terrorçunu reklama "çəkdi"

Türkiyədə tüklərin tökülməsi üçün məhsul satışı ilə məşğul olan bir şirkət reklamda ABŞ-dakı göydələnlərin partladılması layihəsinin müəllifi əl-Qaidə liderlərindən biri Xalid Şeyx Məhəmmədin şəkilindən sitifadə edib.

Vətəninfo.az-ın məlumatına görə, həmin foto Şeyx Məhəmməd 2003-cü ildə Pakistanda tutulandan sonra çəkilib. 11 sentyabr hücumunun təşkilində ittiham olunan terrorbaşı fotoda ağ köynək geyinib, sinəsində və kürəyində isə tüklər görünür.

Şirkətdən verilən açıqlamaya görə, "Tüklər özləri tökülməyəcək" şüarı üçün seçilmiş foto təsadüfən seçilib.

"Bu, qəsdən edilməyib. Kişi terrorçu fəaliyyətinə görə deyil, bol tüklərinə görə seçilib. Biz bilmirdik ki, o terrorçudur", şirkətin təmsilçisi Mehmet Can Yıldız Hurriyet Daily News-a deyib.

Xalid Şeyx Məhəmməd hazırda ABŞ-da yerləşən Guantanamo həbs düşərgəsində saxlanılır. 11 sentyabr hücumu üzrə hesabatda o, 2001-ci ildə baş verən hadisənin "əsas arxitektoru" adlandırılır.