Ukraynada atəşkəs razılaşması pozula bilər

Ukraynanın şərqində Debaltseva şəhərində döyüşlər səngimir. Beynəlxalq vasitəçilərin köməyi ilə əldə olunmuş atəşkəs haqqında razılaşma pozulma təhlükəsi qarşısındadır.

Vətəninfo.az xəbər verir ki, Ukraynanın anti-terror əməliyyatı qərargahının nümayəndəsi fevralın 17-də keçirilən brifinq zamanı separatçıların bütün gün ərzində hücumları davam etdirdiklərini və nəticədə Debaltseva şəhərinin bir hissəsini ələ keçirməyə nail olduqlarını deyib. Onun sözlərinə görə, hazırda şəhərdə küçə döyüşləri gedir.

Separatçılar isə Ukrayna döyüşçülərinin mühasirədən özbaşına, kiçik qruplarla çıxmağa cəhd etdiklərini və bəzi hallarda könüllü təslim olduqlarını vurğulayırlar.

ATƏT nümayəndələri münaqişə tərəflərinə etdikləri atəşkəs çağırışının cavabsız qaldığını və missiya əməkdaşlarının vəziyyətə nəzarət etmək üçün Debaltsevaya gedə bilmədiklərini bildirirlər.