Yaşar Qafanlı: “Ürək sevgi ilə döyünməlidir”

Meyxanaçı-müğənni, geniş pərəstişkar ordusu olan Yaşar Qafanlı ilə görüşüb Vətəninfo.az üçün onun yaradıcılıq planları ilə maraqlandıq. Yaşar bəyin Vətəninfo.az-a açıqlaması: “Şigahi xalq ədəbiyyatının bir qolu olan meyxana və meyxana ifaçılarına olan diqqət və qayğı bizi çox ruhlandırır. Ulu öndər Heydər Əliyev cənablarının meyxananın efirdə təbliğ edilməsi üçün gördüyü işlər bizə potensial imkanlarımızı üzə çıxarmaqda yardımçı olur. Meyxana el şənliklərimizin bəzəyidir. Hər bir məclisdə biz meyxana ifaçılarına xüsusi yer ayrılır. Meyxana deyən xiridarın sevən ürəyi olmalıdır. Ürək sevgi ilə döyünməlidir. Vətənini, xalqını, onun mübariz ordusunu sevən insan güclü olur. Həmin gücü sənə sənətini sevib dəstəkləyən xalqın verir.

Mən bu xalqın bir övladı olaraq meyxanamızı təkcə Azərbaycanda deyil, Rusiya vilayətində və xarici dövlətlərdə də təbliğ edirəm. Mən təkcə meyxana ifaçısı deyiləm, həm də müğənniyəm. Muğamlarımızı gözəl bilirəm. Tezliklə meyxana diskimlə bərabər muğam, təsnif, xalq bəstəkar mahnılarından ibarət diskim işıq üzü görəcək. Dekabr ayında Sankt-Peterburqda konsertim olacaq. Mən ona görə xoşbəxtəm ki, mənə tələbat var, bir gündə 5-6 məclisə dəvət alıram. O ki qaldı sizin sevgi ilə bağlı sualınıza, belə cavab verərdim – insan sevəndə ruhu təzələnir, ilham çeşməsi çağlayır, həyat gözündə yenilənir, bir daha əmin olursan ki, sən kiməsə və kimlərəsə lazımsan”.

Biz də Yaşar bəyə uğurlar arzulayırıq.

Araz Hacıyev

Vətəninfo.az