Vətəninfo.az Publika.az-a istinadla xəbər verir ki, primadonna keçmiş köməkçisi Mehriban Hüseynova ilə bağlı şok açıqlamalar verib. O eyni zamanda, keçmiş köməkçisinin onun əleyhinə hazırladığı saxta sənədləri-vəsiyyətnaməni və səs yazısını ortaya çıxarıb.

 İlhamə xanım ilk olaraq Mehriban Hüseynovanın onun qarşısında diz çökərək süründüyünü, ağladığı və bağışlanması üçün yalvardığını göstərən lent yazısını göstərib. Həmin videoda keçmiş köməkçisi "bir qələtdir eləmişəm” deyib elədiklərini etiraf edib və yalvarıb ki, bu söhbət otaqdan kənara çıxmasın.

 Daha sonra primadonna açıqlamalar verib.

 "İlyarım bundan əvvəl Mehriban Hüseynova evimə köməkçi-xadimə qismində gəlib. Onu Lider Televiziyasının işçisi Lamiyə Ələkbərova vasitəsi ilə tanımışam. Sən demə, o zamanla mənim evimdə xoşagəlməz işlər görüb. Oğlumun dostuna deyib ki, qardaş, mənə zəhər tap. O da soruşub ki, nə zəhər, neynirsən? Deyib ki, İlhaməni öldürmək istəyirəm. Bildirib ki, İlhamənin yatdığı yerdə öldürəcəm, venasına hava yeridib, o dünyalıq edəcəm. Oğlumun dostu da bütün bunları telefonuna yazıbmış. Bir gün oğlumun dostu mənə dedi ki, evinə bir kamera yerləşdir. Keçmiş köməkçim sən demə, mənim adımdan vəsiyyətnamə yazıb. Saxta sənədlə varımı-dövlətimi öz adına keçirmək istəyib. Evimdən beş min oğurlayaraq bir qadının yanına gedib ki, saxta sənədə mənim imzama oxşar imza atdırsın. O qadın yanıma gəldi və hər şeyi danışdı. Eyni zamanda, səs yazısını mənə göstərdi. Səs yazısında o, məni söyür, öldürəcəyini deyir. O məni öldürmək üçün siropları yeməyimə qarışdırırmış. Amma özü o yeməklərdən yemirdi. Mən də xəstəhal olurdum. Axırda Türkiyəyə getdim. İki-üç ay ayaq damarlarımı əməliyyat etdirdim. Onu evdən qovandan sonra vəziyyətim yaxşıdır. O qadın məni pis günə qoymuşdu”.

 İlhamə Quliyeva onu da bildirib ki, keçmiş köməkçisi onun evindən brilliant üzük, xəz paltosunu və digər qızıllarını oğurlayıb: "Bu qadın məni öldürmək üçün cadular da yazdırıbmış. Evdən o qədər cadular tapmışıq ki, dəhşətə gəlirəm. Onu evimdən Bakı Şəhər Baş Polis idarəsinə apardılar. Amma orda qeydiyyata salmayıblar. Mən özüm onu polislərin necə maşina otuzdurduqlarını gördüm. Amma sonradan bəlli oldu ki, onu tutmayıblar. Mən əslində onu tutdurmaq istəmirdim. O qadın məni şantaj elədi. Onu müdafiə edən adam mənə xəbər yolladı ki, İlhamənin taclarını əlindən alarıq, əgər Mehribanın bir tükü əskik olsa. Buna görə də mən israr etdim ki, o qadın tutulmalıdır”.

 "Bu qadının əri alfons idi, mən ona siqaret pulu verirdim. O kişi mənə gəlib yalvardı ki, arvadımı bağışla, bir qələtdir eləyib. Mən də elə bilirəm Mehriban tutulub. Amma bağdan gələndə maşını onun evinin yanına sürdürdüm. Birdə onda gördüm ki, Mehriban maşında oturub. Əri çıxdı qabağıma. Dedim mən arvadını tutdurmuşam, burda nə gəzir? Mehriban da başladı qışqırmağa ki, mən sənin oğlunu tutduracağam. Onu da deyim ki, Mehriban elə eləmişdi oğlumun da ayağını evimdən kəsmişdi. İndi oğluma şər atır. Deyib ki, guya mən oğlumu tutdurub həbsdə öldürtdürəcəyəmmiş”.

 Primadonna bildirib ki, Prezidentə, daxili işlər naziri Ramil Usubova məktubla müraciət edəcək. İlhamə xanım bildirib ki, ona sui-qəsd hazırlanıb.

 İlhamə Quliyeva mətbuat konfransında iştirak edən "Yeni Müsavat” qəzetinin müxbirini də hədələyib: "Mənimlə bağlı yalan məlumat vermisiniz. Özünüzü yığışdırın, rəhbərinizə də deyin ki, "rastomoşka” eləsin, yoxsa sizi məhkəməyə verəcəyəm. Mənim ünvanıma şər atmayın. İlhamənin dili də var, dilçəyi də. Mən sakit oturmayacağam, hüququmu müdafiə edəcəyəm”.